अखिल भारतीय मराठी नाट्य परिषद शाखा रत्नागिरीच्या वतीने आयोजित मराठी अभिवाचन स्पर्धेत कलारंग नाट्य प्रतिष्ठान वरवडे प्रथम

रत्नागिरी दि. १७ ऑगस्ट :- अखिल भारतीय मराठी नाट्य परिषद शाखा रत्नागिरीच्या वतीने आयोजित करण्यात आलेली मराठी अभिवाचन स्पर्धा दिनांक १६ ऑगस्ट २०२६ रोजी कॅप्टन ठाकूर सभागृह पटवर्धन हायस्कूल रत्नागिरी येथे संपन्न झाली.

उद्घाटन प्रसंगी भारत शिक्षण मंडळाचे विश्वस्त श्री विनायक हातखंबकर सर, नाट्यपरिषद रत्नागिरी शाखेचे अध्यक्ष समीर इंदुलकर स्पर्धेचे परीक्षक संजय बोरकर आणि राजेंद्र कुमार घाग हे उपस्थित होते. दीप प्रज्वलन आणि नटराज पूजन करून जेष्ठ रंगकर्मी आणि नाट्य परिषदेचे कार्यकारणी सदस्य श्रीकांत पाटील यांच्या शुभ हस्ते श्रीफळ वाढवून करण्यात आले.

सदर स्पर्धेमध्ये एकूण ३६ स्पर्धकांनी सहभाग घेतला होता तब्बल बारा तास चाललेल्या या स्पर्धेमध्ये संपूर्ण रत्नागिरी जिल्ह्यातील स्पर्धक सहभागी झाले होते.

सदर स्पर्धेचे बक्षीस वितरण रत्नागिरीच्या नगराध्यक्ष सन्माननीय शिल्पाताई सुर्वे यांच्या शुभहस्ते पार पडले. बक्षीस वितरण प्रसंगी नगराध्यक्षा श्रीमती सुर्वे यांनी रत्नागिरीतील तमाम रंगकर्मींना आश्वासन दिले की राज्य नाट्य स्पर्धेमध्ये सहभाग घेणाऱ्या रत्नागिरीतील संघांसाठी नगरपरिषदेच्या मालकीचे शहरांमध्ये विविध ठिकाणी जे हॉल किंवा ऍक्टिव्हिटी सेंटर उपलब्ध आहेत ते अल्प दरात रंगकर्मींना उपलब्ध करून देण्यात येतील.

स्पर्धेचा निकाल पुढीलप्रमाणे…

सांघिक पारितोषिके

1. प्रथम क्रमांक – कलारंग नाट्य प्रतिष्ठान वरवडे.

2. द्वितीय क्रमांक – अनन्या एंटरटेनमेंट जांभरुण.

3. तृतीय क्रमांक – गोगटे जोगळेकर महाविद्यालय रत्नागिरी

4. उत्तेजनार्थ – श्रद्धा मयेकर आणि टीम

वैयक्तिक पारितोषिके

1. प्रथम क्रमांक -सौ पूजा जोशी

2. द्वितीय क्रमांक -सौ मधुरा लाकडे

3. तृतीय क्रमांक -श्री योगेश चव्हाण

4. उत्तेजनार्थ – श्रीमती रसिका सहस्रबुद्धे

अखिल भारतीय मराठी नाट्य परिषदेच्या संपूर्ण कार्यकारिणीने स्पर्धा यशस्वी होण्यासाठी मेहनत घेतली. तसेच स्पर्धेचे नियोजन करण्यासाठी कार्यकारणीच्या वतीने श्री अनिल दांडेकर, सौ. अनुया बाम श्री श्रीकांत पाटील आणि ॲड. श्री श्रीकांत भाटवडेकर या टीमने स्पर्धेचे उत्तम नियोजन केल्याचे सर्व स्पर्धकांनी आवर्जून सांगितले.

स्पर्धेच्या उद्घाटन वेळी नाट्य परिषदेचे प्रमुख कार्यवाह श्री वामन कदम यांनी सूत्रसंचालन केले तसेच बक्षीस वितरणा वेळेचे सूत्रसंचालन श्री सुनील बेंडखळे यांनी केले.