देवरूख दि. ८ (प्रतिनिधी) :- संगमेश्वर तालुक्यामधील प्रिंट व डिजिटल क्षेत्रात पत्रकारितेत कार्य करणाऱ्या पत्रकार व प्रतिनिधींना मराठी पत्रकार दिनानिमित्त देवरुख शिक्षण प्रसारक मंडळाच्या आठल्ये-सप्रे महाविद्यालय एन.एस.एस. (+२स्तर) विभागाकडून बांधवांच्या सन्मान सोहळ्याचे आयोजन करण्यात आले होते.
कार्यक्रमाच्या सुरुवातीला आद्य पत्रकार आचार्य बाळशास्त्री जांभेकर यांच्या प्रतिमेस मान्यवरांनी अभिवादन केले. प्राचार्य डॉ. नरेंद्र तेंडोलकर यांच्या हस्ते उपस्थित पत्रकार व प्रतिनिधीना भेटवस्तू देऊन गौरविण्यात आले. यामध्ये सुरेश सप्रे, सागर मुळ्ये, सुरेश करंडे, सचिन मोहिते, मीरा शेलार-भोपळकर, निलेश जाधव, शेखर जोगळे, मिथुन लिंगायत यांचा समावेश होता.
प्राचार्य डॉ. तेंडोलकर यांनी आपल्या मनोगतात दर्पणकार बाळशास्त्री जांभेकर यांच्या पत्रकारितेमधील कार्यकर्तृत्वाचा आढावा घेतला व निष्ठेने पत्रकारितेचा वसा घेतलेल्या उपस्थित पत्रकारांना त्यांच्या चांगल्या कार्यानिमित्त शुभेच्छा दिल्या.
पत्रकारांच्यावतीने जेष्ठ पत्रकार सुरेश सप्रे व सागर मुळ्ये यांनी आपले मनोगत व्यक्त करताना बाळशास्त्री जांभेकर यांच्या कार्यकर्तृत्वाचा सखोल आढावा घेतला.
पत्रकार म्हणून बाळशास्त्री जांभेकर यांनी केलेले विविधांगी कार्य, पत्रकारिता क्षेत्राला दिलेली नवी ओळख व योग्य दिशा याबाबत सविस्तर माहिती सागर मुळे यांनी दिली.
विद्यार्थ्यांना एक व्यावसायिक संधी म्हणून प्रामाणिक व समाजपयोगी पत्रकारिता करण्याचे आवाहन याप्रसंगी सुरेश सप्रे यांनी केले.
आकांक्षा शिवगण(११वी कला) हिने बाळशास्त्री जांभेकर यांचा जीवनपट संक्षिप्त स्वरूपात आपल्या वक्तृत्वातून उलगडून दाखवला. गेली तीन दशके ते आजपर्यंत वृत्तपत्र पत्रकारितेत झालेले बदल अधोरेखित करून, कार्यरत असणाऱ्या प्रिंट मीडिया क्षेत्रातील पत्रकार व प्रतिनिधी यांच्या कार्याचा सखोल आढावा प्रा. दळवी यांनी घेत संगमेश्वर तालुक्यातून अल्पावधीतच लोकप्रिय झालेल्या डिजिटल न्यूज चॅनेलबाबत माहिती दिली
आजच्या वेगवान माहिती तंत्रज्ञानाच्या युगात वृत्तपत्रांचे महत्त्व अजूनही कमी झालेले नसून, वृत्तपत्रे ही माहिती आणि ज्ञानाने समृद्ध करणारी, मनोरंजन, कला, साहित्य, विज्ञान, तंत्रज्ञान यासह सर्व विषयांमध्ये वाचकांना परिपूर्ण करणारी एक प्रचंड मोठी डेटा बँक असल्याने विद्यार्थ्यांनी वृत्तपत्रांचे वाचन नियमित करावे असे आवाहन करून प्रा. दळवी यांनी केले.
या कार्यक्रमाला बहुसंख्य विद्यार्थ्यांसह एन.एस.एस. कार्यक्रमाधिकारी प्रा. सीमा कोरे, प्रा. डॉ. सुनील सोनवणे, क्रीडा प्रशिक्षक संजय इंदुलकर यांची उपस्थिती होती. कार्यक्रमाचे प्रास्ताविक मयुरेश राणे यांनी तर आभार प्रदर्शन प्रा. स्वप्नाली झेपले यांनी केले. कार्यक्रमासाठी प्रा. वसंत तावडे, प्रा. विजय मुंडेकर, सहाय्यक अमोल वेलवणकर व रुणाली पवार यांनी विशेष परिश्रम घेतले.
