राज्याचे उद्योगमंत्री उदय सामंत यांच्या वाढदिवसानिमित्त लहान मुलांसाठी मोफत 2D इको तपासणी व हृदय शस्त्रक्रिया शिबिराचे आयोजन
रत्नागिरी दि. १६ :- शिवसेना वैद्यकीय मदत कक्ष, ज्युपिटर हॉस्पिटल ठाणे, उदय सामंत वैद्यकीय मदत कक्ष, डॉ. श्रीकांत शिंदे फाउंडेशन आणि आरोग्यदूत फाउंडेशन यांच्या संयुक्त विद्यमाने रत्नागिरी व सिंधुदुर्ग जिल्ह्यातील ० ते १८ वयोगटातील लहान मुलांसाठी मोफत 2D इको तपासणी तसेच आवश्यकतेनुसार हृदय शस्त्रक्रिया शिबिराचे आयोजन करण्यात आले आहे.
महाराष्ट्र राज्याचे उद्योग मंत्री तथा पालकमंत्री रत्नागिरी जिल्हा ना. श्री. उदय सामंत यांच्या वाढदिवसानिमित्त या सामाजिक उपक्रमाचे आयोजन करण्यात आले असून, ग्रामीण व दुर्गम भागातील गरजू मुलांना उच्च दर्जाची हृदय तपासणी व उपचाराची सुविधा उपलब्ध करून देणे हा या उपक्रमाचा मुख्य उद्देश आहे.
हे शिबिर शनिवार, दिनांक २० डिसेंबर २०२५ रोजी सकाळी १० ते दुपारी ४ वाजेपर्यंत आयोजित करण्यात आले असून, जिल्हा शासकीय रुग्णालय, रत्नागिरी येथे शिबिर होणार आहे.
या शिबिरात प्रमुख उपस्थिती म्हणून ना. श्री. उदय सामंत, आमदार श्री. किरण (भैय्यासाहेब) सामंत तसेच डॉ. आशितोष सिंग सर (तज्ञ डॉक्टर, ज्युपिटर हॉस्पिटल ठाणे), अनुभवी वैद्यकीय तज्ज्ञांकडून तपासणी केली जाणार आहे.
या उपक्रमाच्या यशस्वी आयोजनासाठी आमदार श्री. किरण सामंत व आरोग्यदूत मंगेश चिवटे यांनी संयोजनाची जबाबदारी सांभाळली आहे. गरजू पालकांनी आपल्या मुलांची तपासणी करून घेण्यासाठी या संधीचा लाभ घ्यावा, असे आवाहन आयोजकांकडून करण्यात आले आहे.
हा उपक्रम समाजातील दुर्बल घटकांपर्यंत आरोग्यसेवा पोहोचवण्याच्या दृष्टीने महत्त्वपूर्ण ठरणार असून, अनेक बालकांना यामुळे नवजीवन मिळणार आहे.
