दाभोळ येथे प्रभाग समितीची आढावा बैठक उत्साहात; विकासकामे आणि योजनांचा सखोल आढावा

दापोली दि. १० सप्टेंबर (सागर गोवळे) : ग्रामपंचायतीच्या सभागृहात जिल्हा परिषद गट दाभोळ प्रभाग समितीची महत्त्वपूर्ण आढावा बैठक जिल्हा परिषद सदस्य सौ. साधना मिहीर महाजन यांच्या अध्यक्षतेखाली नुकतीच संपन्न झाली.

या बैठकीस पंचायत समिती उपसभापती सौ. नम्रता तोडणकर, पंचायत समिती सदस्य सौ. अंकिता घुबडे आणि विस्तार अधिकारी श्री. विघ्नेश खांडके यांची प्रमुख उपस्थिती होती. या बैठकीत महाराष्ट्र शासनाच्या विविध विभागांचे अधिकारी व कर्मचारी मोठ्या संख्येने उपस्थित होते.

ग्रामपंचायतींचा सखोल आढावा व समन्वय

बैठकीदरम्यान दाभोळ जिल्हा परिषद गटातील सर्व ग्रामपंचायतींच्या ग्रामविकास अधिकाऱ्यांकडून प्रभाग समिती अध्यक्षांनी सखोल आढावा घेतला. यामध्ये प्रामुख्याने:

विकासकामे: गावांतर्गत मंजूर असलेल्या विविध विकासकामांची सद्यस्थिती.

लाभार्थी योजना: दिव्यांग, शेतकरी, महिला, एकल पालक आणि घरकुल योजनांच्या लाभार्थ्यांची अद्ययावत माहिती.

ग्रामस्थ-प्रशासन संवाद: उपस्थित ग्रामस्थांना आपापल्या ग्रामपंचायतींमधील विकासकामांबाबत प्रश्न व शंका मांडण्याची संधी देण्यात आली, ज्यामुळे ग्रामस्थ आणि प्रशासन यांच्यात चांगला समन्वय साधला गेला.

रस्त्यांच्या दुर्दशेवर ग्रामस्थांची नाराजी; अधिकाऱ्यांना निर्देश

शासकीय विभागनिहाय आढावा घेताना जिल्हा परिषद बांधकाम, सार्वजनिक बांधकाम, शिक्षण, महिला व बालविकास, कृषी, उमेद, लघुपाटबंधारे, पाणीपुरवठा, महावितरण आणि एस.टी. महामंडळ या सर्व विभागांतील योजनांची अंमलबजावणी व प्रलंबित कामांचा लेखी अहवाल सादर करण्याचे निर्देश देण्यात आले.

सार्वजनिक बांधकाम विभाग आणि जिल्हा परिषद बांधकाम विभागाच्या ताब्यातील रस्त्यांच्या दुरवस्थेबाबत सर्वच ग्रामस्थांनी तीव्र नाराजी व्यक्त केली. याची दखल घेत सौ. साधना महाजन यांनी संबंधित अधिकाऱ्यांना रस्त्यांच्या देखभाल-दुरुस्तीवर त्वरित कारवाई करून लेखी अहवाल सादर करण्याचे कडक निर्देश दिले.

“लोकप्रतिनिधी, प्रशासन आणि ग्रामस्थ ही समाजाच्या विकासाची एक टीम आहे. केंद्र व राज्य शासनाच्या सर्व कल्याणकारी योजना समाजातील शेवटच्या घटकापर्यंत पोहोचवणे ही या संपूर्ण टीमची एकत्रित जबाबदारी आहे.”