आमदार किरण सामंत यांच्या अध्यक्षतेखाली एकात्मिक आरोग्यवर्धिनी समितीची सभा उत्साहात संपन्न
लांजा, दि. १२ जुलै : लांजा–राजापूर विधानसभा मतदारसंघाचे आमदार श्री. किरण सामंत यांच्या अध्यक्षतेखाली एकात्मिक आरोग्यवर्धिनी समितीची महत्त्वपूर्ण सभा उत्साहपूर्ण वातावरणात संपन्न झाली. सभेमध्ये आरोग्य विभागासह विविध शासकीय विभागांच्या कामकाजाचा सविस्तर आढावा घेण्यात आला. ग्रामीण व दुर्गम भागातील नागरिकांना दर्जेदार, सुलभ व वेळेवर आरोग्य सेवा उपलब्ध करून देण्यासाठी विविध उपाययोजनांवर सखोल चर्चा करण्यात आली.
बैठकीत प्राथमिक आरोग्य केंद्रे व आरोग्य उपकेंद्रांतील सुविधा अधिक सक्षम करणे, डॉक्टर व कर्मचाऱ्यांच्या रिक्त जागा भरणे, आवश्यक औषधसाठा उपलब्ध ठेवणे, माता-बाल आरोग्य सेवा बळकट करणे, कुपोषण निर्मूलन, संसर्गजन्य व असंसर्गजन्य आजारांवरील प्रतिबंधात्मक उपाययोजना, नियमित लसीकरण, स्वच्छता अभियान तसेच आरोग्य जनजागृती कार्यक्रमांची प्रभावी अंमलबजावणी यासंदर्भात सविस्तर आढावा घेण्यात आला.
यावेळी आमदार श्री. किरण सामंत यांनी सर्व विभागांनी परस्पर समन्वयाने कार्य करून शासनाच्या विविध आरोग्य योजनांचा लाभ समाजातील शेवटच्या घटकापर्यंत पोहोचविण्यासाठी प्रभावी अंमलबजावणी करावी, असे निर्देश दिले. नागरिकांना अधिक गुणवत्तापूर्ण आणि लोकाभिमुख आरोग्य सेवा उपलब्ध व्हाव्यात यासाठी आवश्यक त्या उपाययोजना तातडीने राबविण्याच्या सूचनाही त्यांनी संबंधित अधिकाऱ्यांना दिल्या.
बैठकीदरम्यान विविध विभागांच्या कामकाजाचा आढावा घेत प्रलंबित प्रश्नांवर चर्चा करण्यात आली. आरोग्य सेवांमधील अडचणी, पायाभूत सुविधांची आवश्यकता, रुग्णसेवा अधिक परिणामकारक करण्यासाठी आवश्यक उपाययोजना तसेच विभागनिहाय कृती आराखडा तयार करण्याबाबत मार्गदर्शन करण्यात आले.
लोकप्रतिनिधींनी आपल्या-आपल्या क्षेत्रातील आरोग्यविषयक समस्या सभेपुढे मांडल्या. ग्रामीण भागात आरोग्य सुविधा अधिक सक्षम करण्यासाठी आवश्यक उपकरणे, मनुष्यबळ, रुग्णवाहिका सेवा, नियमित आरोग्य शिबिरे तसेच जनजागृती मोहिमा राबविण्याची मागणी करण्यात आली. संबंधित अधिकाऱ्यांनी या मागण्यांची सकारात्मक दखल घेत आवश्यक ती कार्यवाही करण्याचे आश्वासन दिले.
सभेच्या समारोपात आमदार श्री. किरण सामंत यांनी सर्व विभागांनी समन्वयाने कार्य करून आरोग्य सेवा अधिक लोकाभिमुख, परिणामकारक व सर्वसमावेशक करण्यासाठी प्राधान्याने काम करावे, तसेच शासनाच्या आरोग्य योजनांचा लाभ प्रत्येक गावापर्यंत प्रभावीपणे पोहोचवावा, असे आवाहन केले.
या बैठकीस माजी आमदार श्री. राजन साळवी, जिल्हा परिषद उपाध्यक्ष तथा आरोग्य समिती सभापती श्री. विलास चाळके, लांजा पंचायत समिती सभापती सौ. मानसी आंबेकर, संगमेश्वर पंचायत समिती सभापती सौ. शर्वरी वेल्ये, लांजा नगराध्यक्षा सौ. सावली कुरूप, राजापूर तहसीलदार श्री. विकास गबरे, लांजा तहसीलदार सौ. प्रियांका डोळे, जिल्हा आरोग्य अधिकारी डॉ. अनिरुद्ध आठल्ये, जिल्हा परिषद व पंचायत समिती सदस्य, तालुका आरोग्य अधिकारी, विविध विभागांचे अधिकारी, आरोग्य विभागाचे कर्मचारी तसेच समितीचे पदाधिकारी मोठ्या संख्येने उपस्थित होते.
– डॉ. अनिरुद्ध आठल्ये, जिल्हा आरोग्य अधिकारी, जिल्हा परिषद, रत्नागिरी
